سنة تالتة في الكلية، طلعنا رحله اسكندرية ... واحد من اصحابي، إداني حتة شوكولاتة شكلها شيك قوي ... بصراحة استغربت من ذوقه، لأن دة مكنش طبعنا مع بعض :) ... طبعاً لأني من عشاق الشوكولاتة، فتحت بدون تفكير و حطيتها في بقي ... اكتشفت ساعتها اني باكل مرقة دجاج ماغي اللذيذة :)
لو اني فكرت للحظة واحدة أبص للي صاحبي إدهولي، بدل بس ما أبص على الغلاف الشيك، مكنتش أكلت.
الأكيد اننا جميعاً تربينا على الاهتمام بالشكل بدون النظر إلي المضمون. ممكن جداً أقدم أي كلام فارغ و الناس تقتنع بيه و تحبه و تصدقه لو أني بس حطيته في غلاف شيك أو علبة قطيفه حمراء أو مذيعة جميلة.
لكن لو المضمون جيد و يستحق النقاش والتفكير بس الأسلوب مش عجبنا قوي، هنسيب الأفكار و نقعد نتناقش في الطريقة و الشخص.
و بعدين نقعد نسأل نفسنا، هو الغرب سبقنا ليه؟
2 comments:
عجبني اوي طريقه توصيلك للفكره ..اسمحلي اعملها شاير :)
أشكرك ... يكون لية الشرف :)
Post a Comment