لأني قررت أحط جزمة قديمة في بقي إلتزاماً بقرار المجلس العسكري ومن بكره هابطل أحاول التأثير على أي حد ... ولأني خلاص طهقت من الهبل والعتة اللي ماشي في البلد ... قررت أن اكتب الأتي، واللي يزعل يتفلق.
مع الاعتراف بأن الاخوان بيتصرفوا بمنتهي الغباء السياسي وفقدوا الكثير من المصداقية التي حازوا عليها الشهرين اللي فاتوا، أي واحد يتهم الاخوان أنهم فلول النظام القديم أو الهبل ده يبقي يا مغرض يا جاهل لأن الاخوان أكتر المضطهدين في ال-٦٠ سنة إلي فاتت. والي مبيعرفش في السياسه ولا بيعرف يقرا كتاب تاريخ، يرحمنا و يسكت أحسن.
أما اللي بيقولوا إن اللي هيصوتوا بلا بتوع اجندات و كنتاكي والهطل دة، الله يصلح حالك تقول لي أجيب الكنتاكي دة منين علشان العيال عندي جعانة.
والحقيقة الفريقين مبيفهموش يعني إيه حرية رأي ولا ديموقراطية.
يا سادة:
- ١. الاخوان فصيل سياسي أساسي في مصر لم يكونوا يوماً عملاء للسلطة بل ودفعوا اثماناً باهظة
- ٢. اختلافنا مع الاخوان هو إختلاف في الأليات السياسية التي يتخذونها أحياناً، بغض النظر عن الإجماع العام للقوي السياسية الاخري
- ٣. من هذه الأليات أحيانا إستخدام غير مبرر للدين في السياسة
- ٤. من حق الاخوان التصويت بما يشاؤون
- ٥. كل من سيقول نعم وكل من سيقول لا يحبون مصر بنفس القدر
- ٦. لم يخن أي شخص الشرعية الثورية سواءً من صوت بلا أو بنعم، وانما هي مجرد اجتهادات شخصية
- ٧. سوف يتقبل الخاسرون الخسارة بل وسيعملون على أن تتحرك مصر في إتجاه الديمقراطية مع أصحاب الرأي الفائز
- ٨. لو طلع إن رأي الأقلية هو اللي صح، مش عاوزين خوتة دماغ و كلام زي "مش قلنا لكوا". ألف باء ديموقراطية أن يتحمل الجميع مكاسب أو تبعات رأي الأغلبية.
أما اللي لسه بتكلم عن مسلم و مسيحي في مصر، متستهلش مني غير "طز فيك".
أنا واخد أجندتي و ريح أقول لا يوم السبت.
0 comments:
Post a Comment